AOAOGA FAATUSI PAIA

O LE ATUA O AMATAGA

Kenese 1:1-3 “Na faia e le Atua le lagi ma le lalolagi i le amataga. Sa soona nunumi le lalolagi ma ua gaogao, sa ufitia foi le moana i le pouliuli; na fegaoioiai foi le Agaga o le Atua i le fogātai. Ua fetalai mai le Atua, Ia malamalama; ona malamalama ai lea.”

A o alo atu mo fuafuaga faataatitia o lenei tausaga, e taua tele le sa’o ma le manino o le faavae o le faatulagaina o mea uma mo lou soifua ma lou aiga. O le ulua’i fuaiupu lava o le Tusi Paia, e faailoa mai ai ni mea e taua tele mo le faavaeina o o tatou olaga. E tali ai fesili nei: O ai le faapogai o mea uma? O ai e ao ona muamua i mea uma? O fea e taula ai lo’u faatuatua? O ai e tulimata’i iai la’u vaai e faataunuuina mea uma?

O le tali e mai lava i fuaiupu muamua o le Tusi Paia. O le amataga ma le faapogai o mea uma o le Atua. O lona mana e ala i le galuega a Lona Agaga e gaioi i mea uma. O ia lea e iai le mana e faataunuuina mea uma. 

Manatunatu lelei iai, e leai se isi na iai i le taimi o le foafoaga, ae o le faaosofiaina o Mose e le Agaga Paia na ia tusia ai nei faamaumauga e avea ma tali o le fesili: o fea na tupuga mai ai mea uma? Afai e te talitonu ma talia e moni le tala o le foafoaga o le lalolagi i aso moni e ono, o lona uiga ua e faia se la’a taua o le faatuatua. Ua e talia e ala i mata o le faatuatua, e moni o le Atua lava sa faia le lagi ma le lalolagi i le amataga. O le a lona uiga mo oe i le mataga o lenei tausaga?

O lona uiga, e ao fo’i la ona tuuina atu i le Atua le taulaiga o lou faatuatua i mea ua e sauni e faataunuu i lenei tausaga. Atonu ua iai ni au fuafuaga, pe o tau fuafua pea. Ae o le taua o lenei aso muamua o le tausaga, ia e iloa po o fea e ave iai lau faamuamua.

O mea taua i le ulua’i fuaitau o le Tusi o Kenese e faailoa mai ai ni vaega tetele se lua mo tatou. 

Muamua, o le Aiga Atua sa gaioi uma i le foafoaga. O le Atua le Tama, Le Atua le Upu (Alo), Le Atua le Agaga Paia. Na faamaonia e Ioane “Sa i le amataga, le Lokou, sa i le Atua le Lokou, o le Atua foi le Lokou. O ia lava sa i le Atua i le amataga. Na ia faia mea uma lava; e leai foi se mea e tasi na faia e lei faia e ia.” (Ioane 1:1-3). O lona uiga, ua matua faamautu mai mo oe ma lou aiga, afai ae amata faatasi ma fuafua faatasi lou aiga ma le Atua, e auai uma mai le aiga Atua e faataunuu fuafuaga uma mo oe ma lou aiga. Ae maise lava pe afai o fuafuaga e fuafua faatasi ma Ia.

Lua, e maoa’e le mana na foafoaina ai mea uma. O le maoa’e ma le le mafai ona mataea e o tatou mafaufau o le matautia o le foafoaga matagofie a le Atua, o le molimau ola lea i le matautia o le mana o le Atua e mafai ona fai ai so o se mea. O lona uiga, e leai se mea e le mafai e le mana o le Atua ona faataunuu ai au fuafuaga uma. Aua e leai se mea e le mafai e le mana o le Atua ona fai. 

Sauni nei loa e fuafua ma amata mea uma ma le Atua o amataga. Avea au fuafuaga e taula’i atu i le Atua. E le taumate o se tausaga manuia o le a e alo atu iai.