LESONA 3: O Iesu ma le Taofi o le Au Aposetolo i le Tusi Pa

AOAULI O LE SAPATI 

FAITAUGA MO LE SU’ESU’EGA O LE VAIASO: Mat. 4: 1-11; Mat. 22: 37-40; Luka 23: 13-35, 44, 45; Luka 4: 25-27; Gal. 4: 24-26  

MATUA TAULOTO:  “Ona tali atu ai lea o ia, ua fa'apea atu, Ua tusia, E le na o mea ai e ola ai le tagata, a o afioga uma e tūlei mai i le afioga a le Atua" (Mataio 4: 4).  

   O se tulaga fa'anoanoa i tupulaga o lo o mulimuli mai, ona ua fa'aliliuina le Tusi Pa'ia i le malamalama o le poto ma le atamai fa'a-nei ona po ua fesiligia ai le fa'aosofiaina e le Agaga ma lana pule. O le mea moni, o le Tusi Pa'ia ua pei ua na o ni manatu o le tagata o soifua ma ola i aganu'u ma e le o malamalama i le lalolagi o lo o tatou i ai i le taimi nei. A o le taimi lava fo'i lea, o mea fa'alelagi ua fa'aitiitia lona tāua e oo lava i le ave'esea mai lona ata telē, ma liliu le Tusi Pa'ia o se fa'amaumauga, ua le o le taofi ma le finagalo o le Atua i le fanau a tagata, a ua avea o le taofi o le tagata i le Atua. Ma o lona i'uga, ua avea ai le Tusi Pa'ia i le to'atele o tagata ma le poto fa'aona po nei ua leai sona tāua.    A e ui lava i lea, ua tatou matuā te'ena lava le tulaga lea. Peita'i i le Feagaiga Fou, ua mafai ai ona tatou va'aia se auala ua fa'aosofia ai ina ia tatou va'ai i le Tusi Pa'ia atoa e ala lea i le su'esu'eina o le auala na malamalama ai Iesu ma le au aposetolo i le Feagaiga Tuai, auā ua na o le pau lava lea o le Tusi Pa'ia na i ai i lea taimi. A e na fa'apefea ona feso'ota'i atu i tagata, nofoaga, ma mea na tutupu e pei ona fa'amatalaina mai? O a mea na latou manatu i ai ma metotia na latou fa'amatalaina ai le Tusi Pa'ia? Ia tatou mulimuli ia i latou ma lo latou malamalamaga, ma fa'atusatusa atu i le malamalamaga sese o tagata e le'i osofia e le Agaga Pa'ia, o latou manatu na o le ta'ita'i atu ai i le masalosalo ma le fa'alotolotolua i le Afioga a le Atua.  

     Su’esu’e le lesona o le vaiaso nei e saunia ai mo le Sapati, Aperila 18. 

********

ULUA’I ASO                                                                    APERILA 12 

UA TUSIA 

   O le papatisoga o Iesu e Ioane le Papatiso na fa'ailoga aloa'ia ai le amataga o le galuega a le Fa'aola, na mulimuli mai ai le ta'ita'ina atu o Iesu e le Agaga Pa'ia i le vao matua o Iutaia, i le mea na oo mai ai le tulaga vaivai o le tagata, na fa'aosoosoina ai e Satani. 

Faitau le Mataio 4: 1-11. Na fa'apefea e Iesu ona puipuia mai ia i fa'aosoosoga a Satani i le vao? O le a se mea e tatau ona tatou a'oa'oina mai ai e uiga i le Tusi Pa'ia mai le tala lea?    _____________________________________________________________  _____________________________________________________________ 

   Ina ua fa'aosoosoina i le fia 'ai, na tali atu Iesu: "Ua tusia, "Ua le na o mea ai e ola ai le tagata, a o afioga uma e pa'u mai le fofoga o le Atua" (Mat. 4: 4). Na fa'asino i tua e le Atua i le Afioga ola ma lona taunu'uga, ma e aumai mai le lagi. O le auala lenei, na ia fa'amausalīina ai le pule a le Tusi Pa'ia. A ina ua fa'aosoosoina i malo o le lalolagi ma lona mamalu, na tali atu Iesu, "Ua tusia, "E te ifo atu ia Ieova lou Atua ma ua na o ia lava e te auauna i ai" (Mat. 4:10, Luk 4: 8). Ua fa'amanatu mai e Keriso ia i tatou o le tapua'iga moni o le tulimata'i atu lea i le Atua a e le o se tasi lava, ma o le gaua'i lea i lana Afioga o le tapua'iga moni lea. A e fa'ai'u i le fa'aosoosoga i le mana'o i mea o le olaga ma mea o i ai, na tali atu ai Iesu, "Ua toe tusia fo'i, "Aua e te tofotofo i le Ali'i lou Atua" (Mat. 4: 7, ma le Luka 4: 12).     O fa'aosoosoga ia e tolu, na tali atu ai Iesu i upu, "Ua tusia." O lona uiga, ua alu tonu lava Iesu i le Afioga a le Atua a e leai lava se isi mea o fa'afetaia'ia ai le o lo o fa'aosooso mai ma taufa'aseseega a Satani. E ao lava ona avea o se lesona malosi mo i tatou uma, o le Tusi Pa'ia, na o le Tusi Pa'ia lava, o le fa'avae ma o le tapula'a lea o lo tatou talitonuga.     O le Tusi Pa'ia na o le Tusi Pa'ia lava o le auala lea a Iesu na puipuia mai ai i osofa'iga a le fili. O Iesu o le Atua, a o le puipuia mai o ia mai ia Satani o lea na gaua'i atoatoa atu ai lava ia lava i le Afioga a le Atua.    Ua le na o se manatu po o se taofi, e le o se mea fo'i e le o va'ai toto'a i ai, e faigata, e le o i ai ni upu e faia i le ita, a o upu tāua o le Tusi Pa'ia. O le Tusi Pa'ia i le manatu o Keriso o se pule aupito i silisili ma o se malosi silisili. O le auala la lea, na amata ai lana galuega i se fa'avae mautinoa ma fa'aauau ai pea lava le fausia a'e i le fa'atuatuaina o le Tusi Pa'ia. 

E fa'apefea ona tatou a'oa'oina ina ia amiotonu pea a o fa'alagolago atu i le Afioga a le Atua, ma gaua'i atu i ai. ___________________________________________________________________ 

*********

 ASO GAFUA                                                                   APERILA 13 

O IESU MA LE TULAFONO 

Faitau le Mataio 5: 17-20; Mataio 22: 29; ma le Mataio 23: 2, 3. O le a se mea o fai mai ai Iesu i tusi nei? _____________________________________________________________ _____________________________________________________________ 

   Na a'oa'o e Iesu ona so'o i le usiusita'i i le Upu a le Atua ma le tulafono.  E le'i i ai lava ia te ia sina masalosalo i le pule po o le tāua o le Tusi Pa'ia. A o lo o aumaia le Tusi Pa'ia o le puna o le pule fa'alelagi. Ma na ia fa'apea atu i le au Satukaio, "Ua outou sese lava, ina ua outou le iloa upu o Tusi, ma le mana o le Atua" (Mat. 22: 29). Na a'oa'o e Iesu o sina malamalama lava i le Tusi Pa'ia ma ona a'oa'oga e le lava lea ia iloa ai le upu moni, ma e sili atu fo'i ona tāua, ina ia iloa le Ali'i, e ona le upu moni lea.    

O le a se mea a le Mataio 22; 37-40 e uiga i le manatu o Iesu i le tulafono a Mose?  _____________________________________________________________ _____________________________________________________________ 

   O le faitau lenei i le faitulafono, na taaofa'i ai e Iesu le Poloa'iga e Sefulu, na tu'uina atu ia Mose pe a ma le 1,500 tausaga mulimuli ane. E tatau lava ona iloa le auala na taula'i ai le va'ai a Iesu i le tulafono i le Feagaiga Tuai ma si'itia i se tulaga maualuga. E to'atele le au Kerisiano na latou fa'ai'u seseina fa'apea o le Poloa'iga fou lenei na tu'uina mai, ma ua suia ai le tulafono o le Feagaiga Tuai i le tala lelei o le Feagaiga Fou. Peita'i o le mea moni lava o mea ia na a'oa'oina e Iesu e fa'avae mai le tulafono o le Feagaiga Tuai. Na susu'e e Keriso ma fa'aalia atoatoa le tulafono ina ia mafai e Poloa'iga nei e lua (o le taaofa'iga o Poloa'iga e Sefulu, o Poloa'iga muamua e fa e taula'i atu i le va o le tagata ma le Atua, ma o le ono lona lua o lo o taula'i i le va o le tagata ma le isi tagata) e fa'alagolago i tulafono uma ma le au perofeta" (Mat. 22: 40). O le auala la lenei, na si'itia ai fo'i e Iesu le Feagaiga Tuai atoa uma ina ua ia fetalai mai, "O le tulafono ma le au perofeta, ona o le auala pu'upu'u lea e liliu ai i le tulafono, ma le au perofeta, ma tusitusiga, po o vaega uma ia e tolu o le Feagaiag Tuai.     Na fa'asino atu e Keriso i Tusi Pa'ia o se pule e le fesiligia, ma e tatau fo'i ona tatou faia le mea lava fo'i lea e tasi. E tatau lava ona tu'uina atu le Tusi Pa'ia o le Upu a le Atua silisili, i le fa'ai'uga o le finauga tele ma le fa'avae o le fa'atuatuaga uma." - Ellen G. White, Christ's Object Lessons, pp. 39, 40.  

A fa'apefea pe afai e i ai se isi e fa'atautavā na te ave'esea lou agaga gaua'i i le Upu a le Atua? 

**********

ASO LUA                                                                         APERILA 14 

IESU MA LE TUSI PA'IA ATOA UMA 

Faitau le Luka 24: 13-35, 44, 45. Na fa'apefea ona fa'aaogaina e Iesu le Tusi Pa'ia ia a'oa'o ai le au so'o i le fe'au o le tala lelei? _____________________________________________________________ _____________________________________________________________ 

Ina ua mae'a le maliu o Keriso, na le iloa e ona so'o se mea a fai ma masalosalo. Na fa'apefea ona tupu lenei mea? O le a lona uiga? O le mataupu lenei o Luka, na tatou iloa ai na fa'aali fa'alua Iesu ia i latou, muamua i le to'alua i le ala i Emau, ona soso'o ai lea ma isi. E lua mea ese'ese, na fa'amatala e Iesu le fa'ataunu'uina o nei mea uma mai valo'aga o le Feagaiga Tuai: "Ona fa'amatala ai lea e ia ia te i la'ua o mea ua tusia ia te ia i Tusi uma, ua amata mai ia Mose atoa ma le au perofeta uma, na ia fa'amatalaina atu ia i la'ua mea uma o i le Tusi Pa'ia mea e fa'atatau ia te ia" (Luka 24: 27).     E le gata i lea i le Luka 24: 44, 45, ua fetalai mai, "O a'u upu nei...i mea uma ua tusia e uiga ia te a'u i le tulafono a Mose ma le au perofeta ma salamo e tatau ona fa'ataunu'uina."Ona fa'ailoa atu lea e Iesu i o la'ua loto ina ia malamalama i tusi".    Maitau le si'itaga fa'apitoa i le Luka 24: 27 i "tusi pa'ia atoa uma". O le mea lenei o lo o toe fa'amamafa i le faitau lona lua lenei e pei o le "tulafono a Mose ma le au perofeta ma salamo" (Luka 24: 44). O le mea lenei na amata ai ona manino o Iesu, ua liu tino tagata le Upu (Ioane 1: 1-3, 14), fa'alagolago atu i le pule a le Tusi Pa'ia e fa'amatalaina ai mea nei na ta'ua i le faitau selau o tausaga ua mavae. O le liliu atu i le Tusi Pa'ia atoa, na a'oa'o ai e Iesu le au so'o i se fa'ata'ita'iga. A o latou fa'asalalauina atu le fe'au o le tala lelei, o i latou fo'i e tatau ona tatou fa'ailoa atu ia Tusi Pa'ia ina ia aumaia le malamalama ma le mana i tagata fou na liliu mai i le lalolagi.     Ia maitauina fo'i e fa'apefea e le Mataio 28: 18-20, na fetalai ai Iesu i ona so'o i lea taimi (ma i tatou fo'i i le taimi nei) ua "tu'uina mai ia te a'u le pule uma lava i le lagi ma le lalolagi". Peita'i o lea pule o lo o tumau le fa'amausalīina e lona Tamā ma le aiga Atua atoa uma, auā na ia fetalai atu ia i latou, "Ia outou o atu e fai nu'u uma lava ma so'o, papatiso atu ia i latou i le suafa o le Tamā ma le Alo ma le Agaga Pa'ia". Ona oo mai loa lea o le faitau autū: "a'oa'o atu ia i latou ia tausia mea uma ua ou fai atu ai ia te outou". O a mea o a'oa'o e Iesu ma poloa'i mai ai? O ana a'oa'oga o lo o fa'avae i Tusi Pa'ia uma. O lo o i luga o le pule fa'avalo'aga a le Upu na ia Afio mai ai, ma o lo o i ai le fa'ataunu'uina o valo'aga o le Tusi Pa'ia na ia tu'uina atu i lona Tamā.   

Afai ua talia e Iesu Tusi Pa'ia uma, aisea la e tatau ai ona tatou faia? E le gata i lea, e fa'apefea ona tatou a'oa'oina ia talia le pule a le Tusi Pa'ia atoa uma, e tusa lava po ua tatou iloa e le o mea uma e mana'omia pea le fa'aaogaina mo i tatou i le asō? Aumai lau tali i le vasega i le Sapati. 21. 

**********

ASO LULU                                                                       APERILA 15 

IESU MA LE AMATAGA MA LE TALA FAASOLOPITO O LE TUSI PA'IA 

   Na a'oa'o e Iesu o le Tusi Pa'ia o le Upu a le Atua i le tulaga lea o le mea e fai mai ai e tutusa lava ma le mea o fetalai mai ai le Atua. O lona amata mai o lo o i le Atua, ma o le mea lea, o lo o i ai le pule sili a le Atua i taualumaga uma o le olaga. Na galue lava lea Atua mai le tala fa'asolopito ia fa'aalia lona finagalo i le fanau a tagata e ala lea i le Tusi Pa'ia.    O se fa'ata'ita'iga, i le Mataio 19: 4,5, na ta'ua ai e Iesu le si'itaga na tusia e Mose. Peita'i na fetalai mai Iesu i le faitau lenei ma fa'apea mai, "o lē na faia tagata i le amataga....fai mai, "O le mea lea e tu'ua ai e le tane lona tamā ma lona tinā." A ua le o fai mai ua fetalai mai le Tusi Pa'ia, a ua fetalai mai Iesu, O Lē na faia i la'ua i le amataga...ua fa'apea mai, e fa'atatau i upu a le Foafoa i le mea na ta'ua mai e le tusitala o le Kenese. E moni lava o le Atua, o lo o finagalo i inei o le tusitala o le faitau lenei, e ui lava na tusia e Mose.  

Faitau mau o lo o i lalo. E fa'apefea ona malamalama Iesu i le tala fa'asolopito o tagata ma mea tutupu o le Tusi Pa'ia? 

Mat. 12: 3, 4___________________________________________________ 

Mar. 10: 6-8___________________________________________________  

Mar. 10: 25-27_________________________________________________ 

Luka 11: 51___________________________________________________ 

Mat. 24: 38____________________________________________________ 

   O lo o tausisi pea Iesu i le faia lelei o tagata o le Feagaiga Fou, o nofoaga, ma mea tutupu e pei o le upu moni i le tala fa'asolopito. Na fa'atatau Iesu i le Kenese 1 ma le 2, o Apelu i le Kenese 4, na ai e Tavita le areto, ma Elisaia mai isi tala fa'afa'atusa o le tala fa'asolopito. Na ia ta'ua pea le puapuagatia o le au perofeta anamua (Mat. 5: 12, Mat. 13:57, Mat. 23: 34-36, Mar. 6:4). O le fe'au o le lapata'iga, na fa'amatala ai fo'i e Iesu le taimi po o aso o Noa: "na latou a'ai ma inu, faiavā ma faaavaga, se'ia oo i le aso na ulu atu ai Noa i le va'a, na le iloa fo'i e i latou ina se'ia oo i le lolo, ma ave'esea i latou uma, e fa'apea fo'i pe a sau le Atali'i o le tagata. (Mat. 24: 38, 39). O lo o i ai ia fa'aaliga o mea uma lava na ta'ua e Iesu i le galuega sili lenei i le fa'amasinoga a le Atua ua avea o se mea na tupu i le tala fa'asolopito.    Ona o Iesu lava ia na fa'atatau i tagata nei i le tala fa'asolopito i lona moni a'ia'i, o le a la se mea na fai mai ai e uiga i le malosi o le mana taufa'asese o Satani ona o le to'atele o tagata i le asō, e oo lava i le au Kerisiano, e masani lava ona latou fa'afitia lo latou i ai? Aisea e le tatau ai ona tatou pa'u'u i lea mailei?

*********

ASO TOFI                                                                        APERILA 16 

O LE AU APOSETOLO MA LE TUSI PA'IA      

O le auala fo'i lava lea o lo o va'ai i ai le au tusitala o le Feagaiga Fou e pei ona faia e Iesu. I le mataupu o a'oa'oga, ma tulafono e a'oa'o mai ai le amio, ma le fa'ataunu'uina fa'avalo'aga, o le Feagaiga Tuai mo i latou o le pule lea i le Afioga a le Atua. Ua leai se mea tatou te maua ai, i se mea lava, i le mea ua fai mai ai tagata nei ia po o latou lu'itauina fo'i le pule ma le mausalī i so o se vaega o le Tusi Pa'ia. O a mea a faitau o i lalo o a'oa'o mai ai i tatou e uiga i le malamalamaga o le au aposetolo i le pule o le Afioga a le Atua ?  

Gal. 4: 24-26__________________________________________________ 

Gal. 13: 32-36_________________________________________________ 

Roma 9: 17____________________________________________________ 

Gal. 3: 8______________________________________________________ 

   Ia maitau i faitau nei i le vavalalata o le feso'ota'iga ma le Tusi Pa'ia o le si'ufofoga o le Atua lava ia. O le Galuega 4, a o le'i fa'atumuina e le Agaga Pa'ia, na vivi'i a'e ai le au so'o i le Atua mo le lavea'iga o Peteru ma Ioane, na latou alalaga, ma fa'aeaea i le Atua o le Foafoa i le tautala atu e ala ia Tavita lana auauna. O lona uiga o upu a Tavita o upu ia a le Atua. I le Galuega 13: 32-36, na toe si'itia mai ai fo'i Tavita e Paulo, peita'i o ana upu e fa'atatau i le Atua, ona o le faiupu e 32 fai mai: "i le mea o lo o va'ai ai i le Atua o se autū, na fa'aaogaina ai e Paulo le faitau "Auā ua fa'apea mai le Tusi ia Farao, o le mea moni o lo o fa'apea mai, "Ua fetalai mai le Atua ia Farao." A o le Kalatia 3: 8 i le mataupu o le "Tusi Pa'ia" na fa'aaogaina e sui ai le tulaga o le Atua, o lo o fa'aalia ai le latalata o le feso'ota'iga o le Afioga a le Atua i le Atua.    O le mea moni lava, O tusitala o le Feagaiga Fou na tasi lava lo latou fa'alagolago atu i le Feagaiga Tuai o le Afioga a le Atua. E oo i le faitau selau si'itaga i le Feagaiga Fou mai le Feagaiga Tuai. O le tasi o tagata poto o le Tusi Pa'ia na ia tu'u fa'atasia ia si'itaga i se lisi e 2,688 ia si'itaga fa'apitoa: 400 mai le Isaia, 370 mai le Salamo, 220 mai le Esoto ia ma isi lava. Afai e fa'aopoopo i ai se isi mea i le lisi lenei ni faitau e fa'amanatu mai ai, o autū, o mafua'aga e fai ai, e mafai ona fa'ateleina le fainumera. Ua fa'atumuina le tusi i tusi si'i mai i valo'aga o le Feagaiga Tuai e ta'ua fa'atasi ma le faitau, "ua tusia" (Mat. 2: 5, Mar. 1:2, Mar. 7: 6, Luka 2:23, Luka 3: 4, Roma 3: 4, 8: 36, 9:33, 1 Kor. 1: 19, Kal. 4: 27, 1 Pet. 1: 16).  O mea uma lava nei o lo o fa'amausaliina ai o Tusi o le Feagaiga Tuai o le fa'avae o lo o fausia i luga o a'oa'oga a Iesu ma le au aposetolo.     

O a mea o a'oa'o mai ai i tatou i le mata'utia o so o se manatu e fa'aitiitia ai lo tatou fa'atuatua i le pule a le Tusi Pa'ia? 

*********

ASO FARAILE                                                                  APERILA 17 

SU’ESU’EGA FA’AOPOOPO: Faitau Elena Uaita, "As a Child," pp. 6874, ma le "Temptation," pp. 114-123, in The Desire of Ages."  

   "O le manatu o tagata fai mai e popoto atu nai lo le afioga a le Atua, e sili atu fo'i i le Atua, ma ua le o tutu o latou vae i le fa'avae e lē maluelue, ma aumaia mea uma ia iloilo i le afioga a le Atua, na latou iloiloina le upu i o latou lava manatu i le natura ma le poto, ma e foliga mai e le o ioe ia latou manatu fa'asaienisi, na lafoa'ia o se mea e le aogā i le talitonuga." -Ellen G. White, Signs of the Times, March 27, 1884, p. 1.     "O i latou o e masani ma le poto ma le fuafuaga a le Atua e pei ona fa'aalia i lana afioga, ma avea o tagata e lelei ma malolosi o latou mafaufau; ma e mafai ona avea o ni faigaluega ma le faia'oga sili, o Iesu keriso....Ua tu'uina atu e Keriso i ona tagata ia upu o le upu moni, ma ua vala'auina i latou ina ia galulue i se vaega i le fa'ailoa atu i latou i le lalolagi...E leai se olaga fa'apa'iaina e ese mai le upu moni, o le upu lea. Ma o le a se tāua e tatau ai ona malamalama o tagata uma!"-Ellen G. White, Fundamental on Christian Education, p 432. 

FESILI MO FELAFOLAFOA’IGA:  

(1)    Pe afai o Iesu o le tusitala o Evagelia, a e avea e Paulo tusi o le Feagaiga Tuai o le Afioga a le Atua, o le a se mea o ta'u mai ai ia i tatou e uiga i le tele o taofi i ona po nei e sese ma aisea e tatau ai ia i tatou ia aua ne'i tatou pa'u'u i nei manatu tusa lava po o ai na te a'oa'oina i latou?  

(2)  Na ona avatu ai i tagata se manatu i le tele o tagata atamamai o le Tusi Pa'ia i ona po nei o i ai le masalosalo, o nisi nei o mea o lo o fa'afitia e le to'atele o tagata atamamai i ona po nei. O lo o latou te'ena ia aso e ono o le Foafoaga, a e talia le faitau piliona o tausaga o le fa'a-evolusi. Na latou te'ena Atamu e leai sana agasala i le lalolagi e le'i pa'u. Ua latou te'ena le lolo na tupu i le atulaulau. O nisi ua latou te'ena le i ai o Aperaamo. O nisi ua latou te'ena le tala i le Esoto. O nisi o vavega a Iesu, e aofia i ai le toe tu a'e i le tino. O nisi ua latou te'ena le manatu i valo'aga ua valo'ia mai, lea o ta'ua ai e perofeta le lumana'i, o nisi taimi e faitau seneturi e oo lava i le faitau meleniuma. O a mea ua ta'u mai ai ia i tatou i le mea e tupu pe afai e masalosalo le tagata i le pule ma le mausalī o le Tusi Pa'ia? E le gata i lea o a ni auala e fesoasoani ai i ituaiga tagata ia ina ia malamalama lelei i le upu moni? 

(3)   I le tali i le fesili i le fa'ai'uga o le su'esu'ega i le Aso Lua, e fa'apefea ona tatou malamalama pe fa'apefea e Tusi Pa'ia uma ona osofia e le Agaga Pa'ia, e oo lava i vaega e le o fa'atatau ia i tatou i le asō?