LESONA 4: Tusi Pa'ia- Pogai O lo Tatou Talitonuga i le Atua

APERILA 14

AOAULI O LE SAPATI

FAITAUGA MO LE SU’ESU’EGA O LE VAIASO: Mareko 7:1-13; Roma 2: 4; 1Ioa.2:15-17; 2Kor. 10:5,6; Ioane 5: 46, 47; Ioane 7: 38.

MATUA TAULOTO: “Ina sa'ili ia i le tulafono ma le mau, afai latou te le tautala e tusa ma ia upu, ua leai lava se malamalama ia te i latou” (Isaia 8: 20).

E leai lava se ekalesia Kerisiano na te le fa'aaogaina le Tusi Pa'ia e lagolagoina ai lona talitonuga. A e o le vaega ma le pule a le Tusi Pa'ia i le talitonuga i le Atua e le tutusa ma ekalesia uma. O se mea tāua lenei a o mataupu lavelave fa'ato'a tatou maua pe afai tatou te su'esu'eina ni mea tāua ese'ese se lima e a'afia ai la tatou fa'amatalaga o le Tusi Pa'ia: o le tu, o le mea ua masani ai, aganu'u, pogai po o le mafua'aga, ma le Tusi Pa'ia lava ia.

O mafua'aga po o pogai nei o lo o latou faia se vaega tāua tele i so o se talitonuga lava i le Atua ma so o se ekalesia fo'i. O i tatou o se vaega o tu ma aganu'u e a'afia ai i tatou. Ua tatou iloa uma lava o le mafaufau lelei e mafai ona a'afia ai lo tatou malamalamaga. E i ai uma lava o tatou mafaufau e manatunatu ai ma si'itia ai mea. Tatou te faitauina uma lava le Tusi Pa'ia ma fa'aaogaina mo lo tatou malamalamaga i le Atua ma lona finagalo.

O le fea o mafua'aga nei, po o le tu'u fa'atasia o i la'ua, o i ai le pule i le auala e fa'amatalaina ai le Tusi Pa'ia, ma e fa'apefea ona fa'aaogaina i le feso'ota'i atu o le tasi i le isi? O le fa'amuamua e avatua i so o se mea lava po o se mafua'aga e ta'ita'i atu ai i se mea o lo o fa'amamafaina ma i'u ai i le itulagi i lo tatou talitonuga atoatoa i le Atua.

Su’esu’e le lesona o le vaiaso lenei e saunia ai mo le Sapati, Aperila 25.

****************

ULUA’I ASO - APERILA 19

O TU (UPU TU'U)

O le tu lava ia e le leaga. Na te aumaia galuega ua toe faia i o tatou olaga i aso ta'itasi o se ala e mautinoa ma lona fa'atulagaina. Na te mafaia ona fesoasoani ia i tatou ina ia feso'ota'i pea ma o tatou a'a. O le mea lea, ua le o se mea e ofo ai ona o le tu o lo o ona faia fo'i se vaega tāua i le tapua'iga. Peita'i o lo o i ai nisi o afaina o lo o feso'ota'i atu i tu ma aga.

O le a se mea a le Mareko 7: 1-13 o a'oa'o ai i tatou fa'atatau i le mea na faia e Iesu i nisi o tu ma aga i lona taimi?

_____________________________________________________________

____________________________________________________________

O le tu na fesaga'i ma Iesu na tu'uina atu ma le fa'aeteete i fa'apotopotoga Iutaia mai le faia'oga se'i oo atu i tamaiti a'oga. I le taimi o Iesu, na manatu ai i le nofoaga e o fa'atasi ma le Tusi Pa'ia. O le Tu o i ai le agaga ina ia ola i se taimi umi lava, ma o lo o ia tu'ufa'atasia le tele o le mau mea e le o ni vaega na amata mai ai le Afioga a le Atua ma lana fuafuaga. O tu nei ma aga a tagata- e ui lava na fa'amaonia e toea'ina na fa'auluulu i ai (Mar. 7: 3, 5), o se fa'ata'ita'iga i ta'ita'i o tapua'iga i le fa'apotopotoga o tagata Iutaia-e le tutusa ma poloa'iga a le Atua (Mar. 7: 8, 9). O tu a tagata, ma i'u atu ai lava ina avea le Afioga a le Atua ua leai sona aogā (Mar. 7: 13).

Faitau le 1 Korinito 11: 2 ma le 2 Tesalonia 3: 6. E fa'apefea ona tatou ta'ua le ese'esega o le Afioga a le Atua ma le tu a tagata? Aisea ua sili ai ona tāua ona faia le ese'esega lenei?

__________________________________________________________________________________________________________________________

O le Upu o lo o ola i le Afioga a le Atua o lo o amataina ia i tatou le amio mata'u ma le fa'amaoni. O le fa'amaoni lenei na mafua ai se tu fa'apitoa. O lo tatou fa'amaoni, e ui lava, e mana'omia ina ia ava i le Atua soifua, o lo o fa'aalia lona finagalo i le Afioga tusia a le Atua. Ma o le Tusi Pa'ia o lo o ia taofia se vaega fa'apitoa na te suia ia tu uma lava a tagata. O lo o tu matilatila le Tusi Pa'ia ma e laualuga i tu ma aga a tagata, ma e oo lava i tu e lelei. O tu o lo o tupu a'e ma ese mai ia i tatou ma lo tatou iloa o le Atua ma lana Afioga e masani lava ona mana'omia ina ia iloilo i le fua e fuaina ai o le Tusi Pa'ia.

O a nisi o mea o tatou faia o se ekalesia e mafai ona tusia i lalo o le "tu"? Aisea e tāua ai pea lava ina ia tu'u ese'ese i latou mai a'oa'oga a le Tusi Pa'ia? Aumai lau tali i le Sapati.

****************

ASO GAFUA - APERILA 20

O LE MEA UA TATOU ILOA MA MASANI AI

Faitau le Roma 2: 4 ma le Tito 3: 4,5. E fa'apefea ona tatou iloa le lelei, ma le onosa'i, fa'amagalo, agalelei, ma le alofa o le Atua? Aisea e tāua ai ia lo tatou fa'atuatua ua le na o se mea o i o tatou manatu, poto ma le atamai, a o se mea ua tatou iloa ma masani ai? A o le taimi lava fo'i lea, o a ni auala e mafai ai e lo tatou iloa lea ona fete'ena'i ma le Tusi Pa'ia e oo lava i le ta'ita'ina sese o i tatou i lo tatou fa'atuatuaga?

__________________________________________________________________________________________________________________________

O le mea lea ua masani ai o se vaega o i tatou. E a'afia ai o tatou lagona ma manatu i se auala sili. Na fuafuaina e le Atua i tatou i se auala ona o lo tatou feso'ota'iga ma Lana foafoaga, ma e oo lava i le Atua lava ia, e tāua lava le feso'ota'i atu ma fa'aleleia i mea ua tatou masani ai.

O le fa'anaunauga o le Atua ina ia tatou iloa le matagofie o le feso'ota'i po o mafutaga, o mea o faia ma musika, ma mea ofoofogia o le foafoaga, e oo lava i le olioli i lana fa'aolataga ma le mana o folafolaga o lana Afioga. O la tatou tapua'iga ma le fa'atuatua e sili atu i lo ua na o se a'oa'oga ma filifiliga fai. O mea ua tatou iloa na te fa'aleleia lo tatou taofi i le Atua e oo lava i lo tatou malamalamaga i lana Afioga. Peita'i tatou te mana'omia fo'i ina ia tatou va'ai ma le manino mea e gata mai ai ma le lē lava o mea ua tatou iloa pe a oo mai i le iloa o le Atua ma lona finagalo.

O le a se lapata'iga o maua i le 2 Korinito 11: 1-3? O le a se mea o ta'u mai ia i tatou e uiga i le mea e gata mai ai lo tatou fa'atuatua i lo tatou iloa?

__________________________________________________________________________________________________________________________

O mea ua tatou iloa ma masani ai e mafai ona fa'aseseina ai i tatou. E tusa o le tala a le Tusi Pa'ia, o lo tatou iloa e mana'omia ia mautinoa. E tatau ona fua ma fa'amatalaina e le Tusi Pa'ia. O nisi taimi tatou te mana'omia ia iloa se mea e le o fa'atasi ma le Afioga a le Atua ma lona finagalo. O inei tatou te mana'omia ina ia tatou fa'atuatua i le Afioga a le Atua e oo lava i mea tatou te masani ma fa'anaunau i ai. E tatau lava ona puipuia i tatou ina ia mautinoa e oo lava i mea tatou te masani ai e o fa'atasi ma le Afioga a le Atua ma e le fete'ena'i ma le a'oa'oga manino o le Tusi Pa'ia.

O le fa'atuatua o lo o avea ai le alofa i le Atua ma le alofa i isi (Mar. 12: 28-31) o ni polo'iga autū, ma o le fa'atuatua o ia i tatou e tāua. A o le taimi lava fo'i lea, aisea e tāua ai le tofotofo o i tatou i le Afioga a le Atua?

****************

ASO LUA - APERILA 21

AGANU'U

O tatou o tagata o i se vaega o se aganu'u faa'pitoa. Ua a'afia uma lava i tatou ma a'afia fo'i i aganu'u. E leai lava se tasi e mafai ona sola ese ai. O le mea moni lava, ia manatunatu i le tele o tala o le Feagaiga Tuai ia Isaraelu anamua na fa'aleagaina e aganu'u na si'omia i latou. O le a se mea o tatou manatu ai i le asō e i ai se ese'esega ma le taimi nei? O le Afioga a le Atua na tu'uina mai ia i tatou i se aganu'u fa'apitoa, e ui lava e leai se tuā'oi i le aganu'u lenei. A o lē ma'alofia le fa'amaoniga ma le uiga tosina o le aganu'u i lo tatou malamalamaga i le Tusi Pa'ia, a e le tatau ai fo'i ona leiloa atu i la tatou va'ai le upu moni ma lo tatou malamalamaga i le Tusi Pa'ia ona o le aganu'u fa'apitoa lea. E tatau fo'i ona tatou manatua o i le Tusi Pa'ia le mana e sili atu i le aganu'u ma ituaiga tagata, i mea na tatou ola mai ai po o ai fo'i i tatou. O le tasi lea o mafua'aga e laualuga ai le Tusi Pa'ia i so o se aganu'u lava a le fanau a tagata ma e oo lava i le toe fa'afouina ma fa'asa'oina le mea e mafai ona tatou agasala o maua ai i tatou i so o se aganu'u.

Faitau le 1 Ioane 2:15-17. O le a le uiga o le upu a Ioane ina ua ia fai mai e le tatau ona tatou alolofa i mea o le lalolagi? E fa'apefea ona tatou soifua i le lalolagi a e lē a'afia i tatou i manatu o le lalolagi?

__________________________________________________________________________________________________________________________

Aganu'u e pei lava o isi mea fa'apitoa o le foafoaga a le Atua ua a'afia i le agasala. A e i'u atu ai fo'i i fa'amasinoga a le Atua. Ioe, o nisi vaega o la tatou aganu'u e mafai ona o fa'atasi ma lo tatou fa'atuatuaga, a e tatau lava ona tatou fa'aeteete i le ese'esega o mea nei e lua. E lelei lava le tatau ona lu'itau e ala i le Tusi Pa'ia, pe afai e tatau ai, o le aganu'u o lo o i ai ma le aganu'u e ese mai ia fa'amaonia i le Afioga a le Atua. Se'i vaganā se mea o lo o taula ia i tatou o lo o sau mai luga o i tatou, ma tatou tu'uina atu i e o si'omia i tatou.

Ua auamaia e Elena Uaita ni manatu o i lalo:

"O le au so'o o Iesu e tatau lava ona vavae ese mai le lalolagi mai tulafono fa'avae ma mea o fiafia i ai, peita'i e le fa'apea o le a tu to'atasi lava i latou mai le lalolagi. Na feoa'i pea lava le Fa'aola ma tagata, e le o le fa'amalosia o i latou ina ia faia se mea e le o fa'atasi ma le finagalo o le Atua, peita'i ina ia si'itia a'e ma fa'aeaea ia i latou."-Ellen.G.White, Counsels to Parents, Teachers, and Students, p. 323.

O a ni vaega o lau aganu'u e matuā tete'e i le fa'atuatuaga a le Tusi Pa'ia? E fa'apefea ona tatou tumau e te'ena ia vaega ia o taumafai e fa'aleaga lo tatou fa'atuatuaga?

****************

ASO LULU - APERILA 22

MAFUA'AGA

Faitau le 2 Korinito 10: 5, 6; Fa'ataoto 1: 7; ma le Fa'ataoto 9: 10. Aisea e tāua ai i o tatou manatu le usiusita'i ia Keriso? Aisea ua avea ai le mata'u ia Ieova o le amataga o le poto?

__________________________________________________________________________________________________________________________

Ua tu'uina mai e le Atua ia i tatou le tomai e mafaufau ai ma filifili ai. So'o se mea lava e faia e le tagata ma so o se felafolafoa'iga lava fa'atatau i le Atua e tatau ai ona fa'aaogā lo tatou atamai e mafaufau lelei ai ma aumai ai fa'ai'uga fai. E le mafai ona tatou talia ia le fa'atuatuaga e leai se mafua'aga tatau o i ai. I le fa'ato'a tula'i mai o le sefuluvalu-seneturi i le tupulaga o le Malamalama, po o tupulaga na tele ai le mau su'esu'ega i fa'atuatuaga ese'ese ua tula'i mai, na tele ai manatu o tagata, aemaise lava fa'apotopotoga i le itu i Sisifo, ua sili atu lona mamao i le mea e mafai ona tatou mafaufau i ai ma taunu'u i le fa'ai'uga sa'o.

I le fa'atusatusa atu i le manatu o lo o fa'avae lo tatou malamalamaga i le mea ua tatou masani ai ma iloa, ua oo mai ai le tasi taofi fa'atatau i le filifiliga a le tagata o le puna aupito i silisili lava lea e aumai ai le poto. O le taofi lea fa'apea o le upu moni e le o se mea o e lagona a o le poto po o le mea na aumai e le mafaufau. O le isi fa'aupuga, e i ai lava upu moni o lo o i ai, a ua na o a tatou lava filifiliga ma manatu na te mafaia ona fa'amaopoopoina mai. Ua avea ai le filifiliga po o le manatu o le tagata o se iloiloga o le upu moni. O le filifiliga lea ua avea o se pule e fou a o le'i ioe i ai isi mea uma, e aofia i ai le pule a le ekalesia, ma e oo lava i le pule a le Tusi Pa'ia o le Afioga a le Atua. So o se mea lava e le o fa'amaonia i le mafaufau po o le mea ua filifili ai le tagata e fa'aleaogaina ma e fesiligia. O le uiga lenei ua a'afia ai se vaega tele o le Tusi Pa'ia. O vavega uma ma galuega mamana a le Atua, e pei o le toe tu mai o Iesu, o le fanau mai i le taupou, po o aso e ono o le Foafoaga, ua le o toe manatu fa'apea e moni ma talitonuina.

O le mea moni, e ao lava ona tatou manatu e oo lava i le malosi o lo tatou mafaufau e filifili ai, ua a'afia e le agasala ma e mana'omia ina ia i lalo ifo o le pule a Keriso. Ua pogisa le fanau a tagata i lo latou malamalama ma ua tagata ese mai le Atua (Efe. 4: 18). Tatou te mana'omia le malamalama mai le Afioga a le Atua. E le gata i lea, a o le Atua lo tatou Foafoa, o lo o fa'aalia ai pe a tatou tautala i le Afioga a le Atua, o le manatu po o le filifiliga a le tagata e le'i faia o se mea fa'apea e faia na o ia po o se mea fo'i a le Atua. A e "ona o le mata'u ia Ieova o le amataga lea o le poto" (Fa'at. 9"10, 1:7). Na o lo tatou taliaina lava o le fa'aaliga a le Atua, o lo o tusia i le Afioga a le Atua, ua fa'asilisili i o tatou olaga, ma naunau ia mulimuli i le mea ua tusia i le Tusi Pa'ia, e mafai ai ona tatou filifili ma le tonu.

****************

ASO TOFI - APERILA 23

O LE TUSI PA'IA

O le Agaga Pa'ia, ua fa'aalia ma osofia mea o i le Tusi Pa'ia i le fanau a tagata, na te lē mafai ona ta'ita'i ese i tatou mai le Afioga a le Atua pe ta'ita'i sese mai le Afioga a le Atua. O tagata Aso Fitu, ua avea le Tusi Pa'ia o se pule silisili lea nai lo tu ma aga a tagata, mea ua masani ai ma iloa, filifiliga, po o aganu'u. Na o le Tusi Pa'ia lava o le fua e iloilo ai mea uma o tatou mana'omia e tatau ona iloilo.

Faitau le Ioane 5: 46, 47 ma le Ioane 7: 38. Ia Iesu Keriso lava ia, o le Tusi Pa'ia o le puna lava lea o lo tatou malamalamaga i mea fa'aleagaga. E fa'apefea ona fa'amausalī e le Tusi Pa'ia o Iesu o le Mesia moni?

__________________________________________________________________________________________________________________________

O nisi tagata fai ma ua latou maua se fa'aaliga fa'apitoa ma le fa'atonuga mai le Agaga Pa'ia, peita'i o le mea lenei e le talafeagai ma le fe'au manino a le Tusi Pa'ia. Ona o lo latou manatu o le Agaga Pa'ia o i ai le pule aupito i sili nai lo le Afioga a le Atua. Po o ai lava na te fa'aleaogaina tusitusiga ma Upu na osofia e le Atua ma ave'esea lana fe'au o lo o manino, o lo o savali i se ogaele'ele mata'utia ma e le o mulimuli i le ta'ita'iga a le Agaga o le Atua. O le Tusi Pa'ia ua na o le pau lava lea o lo tatou maluāpapa fa'aleagaga. Na o ia lava tatou te fa'alagolago i ai i mea uma lava i lo tatou fa'atuatuaga.

"E ala i le Tusi Pa'ia o lo o fetalai mai ai le Agaga Pa'ia i le mafaufau, ma una'ia le upu moni i totonu o le loto. Na te fa'aalia le mea sese, ma ave'esea mai le agaga. O le Agaga o le upu moni, o lo o galue e ala i le Afioga a le Atua, e pulea ai e Keriso ona tagata filifilia ia te ia lava."-Ellen G. White, The Desire of Ages, p. 671.

O le Agaga Pa'ia na te lē suia lava le Afioga a le Atua. A e o lo o ia galulue fa'atasi ma le Tusi Pa'ia ia tosina atu i tatou ia Keriso, o lea ua avea ai le Tusi Pa'ia ua na o le pau lava lea o le fua po o le tapula'a mo le mausalī fa'aleagaga o le Tusi Pa'ia. Ua saunia e le Tusi Pa'ia a'oa'oga moni (1 Tim. 4: 6), ma a o fa'atuatuaina le Afioga a le Atua ma ua taliaina atoatoa. Ua le o sa tatou galuega le fa'amasino o le Tusi Pa'ia. O le Afioga a le Atua, ua i ai le aiā tatau ma le pule ia fa'amasino ai i tatou ma o tatou manatu. A o le Afioga tusitusia a le Atua lava ia.

Aisea ua avea ai le Tusi Pa'ia o se ta'iala e saogalemu ai i fesili fa'aleagaga nai lo tatou lagona ma o tatou lava manatu? O le a se mea e tupu pe afai tatou te le talia le Tusi Pa'ia o le tapula'a tatou te tofotofoina ma iloiloina ai a'oa'oga e oo lava i o tatou olaga fa'aleagaga?

****************

ASO FARAILE - APERILA 24

SU’ESU’EGA FA’AOPOOPO: Faitau Ellen G. White, "The Scripture a Safeguard," pp. 593-602, in The Great Controversy.

O tu, ma mea e masani ai, aganu'u, filifiliga fai, ma le Tusi Pa'ia e i ai uma lava pe afai tatou te manatunatu i le Afioiga a le Atua. Peita'i tatou te fia fesili se fesili e filifili ai: O le fea o mea nei na te aumaia se tali ma o le pule mulimuli lava lea i lo tatou talitonuga i le Atua? E tasi lea mea e mafai ona tatou fa'amausaliina ai le Tusi Pa'ia, peita'i o se mea na te fa'atagaina le Tusi Pa'ia, e ala lea i le galuega a le Agaga Pa'ia, ina ia a'afia ma suia ai le olaga.

O le isi itu, o le aganu'u, ma le mea masani ai, filifiliga e oo lava i tu, i totonu ma i latou lava, e ono mafai lava ona fa'apea e lē leaga. Ua avea o ni fa'afitauli pe afai e fete'ena'i ma le mea o a'oa'o mai ai le Tusi Pa'ia. Peita'i o le mea lava lena e mafai ona tupu. A o le mea sili ona leaga, pe afai o mea nei ua sili atu i le Afioga a le Atua. Ma o le tele o le tala fa'asolopito i le o ese mai le Atua i le taimi o le Feagaiga Tuai ma le Feagaiga Fou pe afai e oo mai uiga tosina mai fafo atu ma fa'amuamua atu i le fa'aaliga fa'alelagi.

FESILI MO FELAFOLAFOA’IGA:

(1) Aisea e faigofie ai ona taofi i tala a tagata i tu ma aga nai lo le ola i le agaga o le tulafono a le Atua: ia alofa ia Ieova lo tatou Atua ma o tatou loto atoa ma le agaga atoa ma le manatu atoa ma alofa i o tatou tuā'oi e pei o oe ia te oe lava (Mat. 22: 37-40)?

(2) Talanoa i lau tali i le fesili fa'ai'u o le Ulua'i Aso. O le a se vaega o faia e le tu ma aga i la tatou ekalesia? O fea o e va'ai ai i le fa'amanuiaga ma lu'iga i tu ma aga a tapua'iga?

(3) E fa'apefea ona tatou mautinoa o le tu ma aga, tusa lava po o le a lona lelei, na te le suia ai lava le Afioga a le Atua o tapula'a mulimuli lava lea ma la tatou pule?

(4) Afai ua fai mai se tasi na fai lana miti lea na fetalai mai ai Ieova ia te ia, ua ta'u mai ia te ia o le Ulua'i Aso o le aso malolo moni lava lea e tapua'i ai i le taimi o le Feagaiga Fou. E fa'apefea ona e tali atu i le tagata lea, ma o le a se mea o a'oa'o mai ai tala fa'apea ia i tatou fa'atatau i le tatau lava ona iloilo le mea lea i le Afioga a le Atua?

(5) Fa'atalatalanoa le aganu'u lea ua mou atu i la outou ekalesia. E fa'apefea e le aganu'u lea ona a'afia lou fa'atuatuaga? O le a se fa'ata'ita'iga e mafai ona tatou maua mai le tala fa'asolopito na sili ona a'afia ai le aganu'u ia le mea na faia e le ekalesia lea ua toe va'ai nei i ai, e lē lelei?