Translate:
MAIMOA I LE LESONA O LE FAAMOEMOE I VAIASO TAITASI I LE TELEVISE MA LE INITANETI
LESONA KUATA 2, 2020
E FA'APEFEA ONA FA'AMATALAINA MA FA'ALILIUINA LE TUSI PA'IA
O le avea o i tatou o tagata Aso Fitu o le toe Afio mai, ma o i tatou o Porotesano, o lona uiga ua tatou talitonu i le sola Scriptura, na o le Tusi Pa'ia lava ma ua na o lea le fa'avae moni o lo tatou fa'atuatuaga ma a'oa'oga. A e fa'apitoa lava lona aogā ma lona tāua i taimi o le i'uga, e pei ona fai mai Elena Uaita, o lo o i ai tagata o le Atua i lalolagi o tumau pea i le Tusi Pa'ia, na o le Tusi Pa'ia lava, o le tapula'a o a'oa'oga ma o le fa'avae o suiga uma."-The Great Controversy, p. 595. O le mea moni, ua le na o i tatou e ese mai i le au Porotesano i le fa'apea mai "ua na o le Tusi Pa'ia lava" o le fa'avae o lo tatou fa'atuatuaga, e ui lava o le to'atele o lo o i ai le manatu e talitonu i mea ia e pei o le Ulua'i Aso (Aso Sa) ia sui tulaga i le Sapati Aso Fitu o le Feagaiga Fou; o le agaga ola pea, o le mu i le afi e fa'avavau i e ua leiloloa; e oo lava i le sau fa'alilolilo lea o Iesu e aunoa ma se leo pe a toe afio mai i le lalolagi lenei ma se'i ese atu lē ua fa'aolaina a o isi o le a tu'ua ma manatu pe fa'apefea e i latou ia ona mou atu.
O le isi fa'aupuga, o le i ai o le Tusi Pa'ia, ma fa'apea e talitonu i ai, o le isi lena mea, e tāua e pei ona i ai. Peita'i, o le fa'atuputeleina o a'oa'oga sese (fa'apea e aumai uma mai le Tusi Pa'ia) o lo o fa'aalia ai, tatou te mana'omia fo'i ia iloa pe fa'apefea ona fa'amatalaina ma fa'aliliu sa'o le Tusi Pa'ia. O le mea lea, o le mataupu o le Ta'iala o le Su'esu'ega o le Tusi Pa'ia o le A'oga Sa a tagata Matutua mo le kuata lenei, "E fa'apefea ona fa'amatala ma fa'aliliu le Tusi Pa'ia." O totonu, tatou te amata mai ai ma le manatu o le Tusi Pa'ia, o le Afioga a le Atua, o le "fa'aaliga lē masese o lona finagalo" ma o le "tapula'a o le amio, o se iloiloga o mea ua oo i ai, o le pule o lo o fa'aalia mai ai a'o'oga, ma o le tusi tāua o fa'amaumau ai galuega a le Atua i totonu o le tala faa'solopito. " - Seventh-day Adventists Believe...2nd ed. (Nampa, Idaho: Pacific Press Publishing Association, 2005), p. 11.
O le Tusi Pa'ia, o le fa'avae ma le puna o le upu moni o lo o tatou talitonu ma folafola atu i le lalolagi. E pei ona fai mai le Tusi Pa'ia, "O Tusi Pa'ia uma lava e mai le Agaga o le Atua ia, e aoga fo'i ia e a'oa'o ai, e a'oa'i ai, e fa'atonu ai, e fa'apoto ai fo'i i le amiotonu" (2 Tim. 3: 16). "O Tusi Pa'ia uma," o le mea moni lava o Tusi Pa'ia uma lava - e oo lava i se Tusi Pa'ia atonu tatou te lē manana'o ai, ma soli i o tatou vae, ma fa'aaogaina i se auala fa'apitoa, atonu e le o sa'o.
Ma o le manatu amata lenei, o le a tatou su'esu'eina ai le auala e a'oa'o mai ai le Tusi Pa'ia ia i tatou i le fa'amatalaina lea e le Tusi Pa'ia o ia lava. O lona uiga, tatou te le o i isi tusi o fa'amatalaina mai ai e pei o le poto fa'asaienisi, filosofia, ma le tala fa'asolopito (pe afai e fa'aaogaina sa'o, e mafai ona avea o se fa'amanuiaga), tatou te sa'ili ina ia susu'e mai totonu o mau o le Tusi Pa'ia ia mea faigaluega o lo o fa'aalia ia upu moni sili o lo o maua i ona laupepa pa'ia. Ua ta'u mai ia i tatou o "tagata pa'ia o le Atua na tautala mai e pei ua osofia e le Agaga Pa'ia" (2 Pet. 1: 21. Ma tatou te talitonu o mea o fai mai ai tagata pa'ia o le Atua o le ki lea e fesoasoani ai ia i tatou i le fa'amatalaina po o le fa'aliliuina o le Afioga a le Atua.
O se fa'ata'ita'iga, na fa'apefea e Paulo ma isi na tusia evagelia ona fa'amatalaina le Feagaiga Tuai? Afai o le mea lea na latou tusia na osofia ai i latou e le Agaga o le Atua, ona mautinoa ai lava lea o mea ia na latou faitauina ma fa'amatalaina le Tusi Pa'ia e mafai ona avea o se fesoasoani fa'apitoa ia i tatou ina ia tatou a'oa'oina mai ai ina ia fai le mea lava lea e tasi. A e na fa'apefea e Iesu ona ia fa'aaogaina ma fa'amatala le Tusi Pa'ia? E leai lava se isi mea tatou te maua mai ai se fa'ata'ita'iga e sili atu i le auala e faitauina ai le Tusi Pa'ia nai lo Iesu.
A o le taimi lava fo'i lea, tatou te iloa ai lava mea o tatou mafaufau i ai ma manatunatu i ai fa'atatau i mea o lo o tusia ai, i le gagana, o le aganu'u, ma le tala fa'asolopito pe fa'apefea ona a'afia i latou faitau ma malamalama i le Afioga a le Atua. E fa'apefea ona tatou fa'amatalaina fa'ataoto, o valo'aga, ma le tala fa'asolopito o tusitusiga pa'ia, fautuaga, ma pesega o vi'ivi'iga, fa'aaliga fa'avalo'aga, ma miti-ma tusitusiga pa'ia atoa uma o i totonu o le Tusi Pa'ia?
O le mau fesili uma nei o le a e silafia ma iloa i le kuata lenei, e pei o a'oa'oga e pei o le afi e mu e fa'avavau, po o le fa'aalia o le pa'ia o le Aso Sa (Sunday), ma talitonu i le Tusi Pa'ia e lē lava lea. E ao lava ona tatou iloa fo'i ona fa'amatala ma fa'aliliu le Tusi Pa'ia.
O Frank M. Hasel, PhD, o le Fa'atonu fesoasoani o le vaega o lo o faia su'esu'ega o le Tusi Pa'ia (Biblical Research Institute (BRI) i le Aumatutua Sili a le Ekalesia Aso Fitu o le Toe Afio Mai. O Michael G. Hasel, PhD, o le Porofesa o le Religion i Southern Adventist University ma o le Fa'atonu o i latou i le vaega a le Institute of Archaelogy and the Lynn H. Wood Archaeological Museum.
